Julen Alonso musikari oriotarrak eta Oinkari dantza taldeak (Villabona), 'Harian' ikuskizuna plazaratuko dute larunbat honetan, irailaren 5ean, Soreasu antzokian, 19:00etan hasiko da emanaldia eta sarrerak salgai daude.

Julen Alonso (Orio, 1996) euskal musikaria eta konpositorea da, batez ere trikitixarekin, ahotsarekin eta pianoarekin egiten duen lanagatik ezaguna. 5 urterekin hasi zen akordeoia ikasten, eta nerabezaroan trikitixarekiko interesa piztu zitzaion. Euskal Herriko hainbat trikitixa txapelketa eta jaialditan sari ugari irabazi zituen.

Bere lehen diskoa Sutan Dantzan izan zen (2018), eta ondoren Eskuetan Bihotza (2021) eta Haria (2025) kaleratu ditu.

Proiektu hauetan guztietan lan egin izan du Oinkari Dantza Taldearekin elkarlanean , hala nola Sutan Dantzan, Eskuetan Bihotza eta 2026an aurkeztutako 'Haria' ikuskizunean. Azken hau aurkeztu du Soreasu antzokian. Musika eta euskal dantza uztartzen dituzte.

Oinkari Dantza Taldea, berriz, 1975ean sortu zen Villabonan, Euskal Herriko dantzak ikasi, jaso eta zabaltzeko helburuarekin. Hasieran gazte talde batek osatu zuen, eta euskararen aldeko mugimenduarekin ere bat egin zuen.

1976an egin zuen lehen emanaldia, eta ondorengo urteetan Gipuzkoako eta Euskal Herriko hainbat herritan dantzatu zuen. Taldeak zailtasun ekonomikoak izan zituen, baina kideen ekarpenekin eta lanarekin aurrera egin zuen. 1977an haurrei dantza irakasteko ikastaroak ere hasi zituen.

1979tik aurrera taldea ahultzen joan zen, eta 1983ko uholdeek materiala galduarazi ondoren, lehen belaunaldiak taldea uztea erabaki zuen.

1992an, herriko jaietan antolatutako Iñude eta Artzainen konpartsaren bidez, Oinkariren bigarren belaunaldia sortu zen. 1997an haur ikastaroak berriro martxan jarri ziren, eta taldeak indarra hartu zuen.

1992tik aurrera Oinkarik ez du beste etenik izan. Belaunaldi ugari igaro dira taldetik, zailtasunak gaindituz eta taldea sendotuz. Gaur egun, Oinkari Dantza Taldea dantzari ugariz osatutako talde sendoa da, ilusioz eta etorkizunari begira jarraitzen duena.

Emanaldirako sarrerak aurrez eros daitezke www. kulturaz.eus atarian. 19 euro balio du.