Gasteizko Ataria Salburuko Hezeguneen Interpretazio Zentroak 'Irudizko Araba' izenburuko erakusketa du ikusgai ostiral honetatik, ArabaClick argazki topaketaren zortzigarren edizioaren barruan. Argazkigintzaren bidez "errealitateari begiratzeko eta hura kontatzeko modu berriak ezagutzeko gonbidapena" da erakusketa, istorio, lurralde eta sentsibilitate desberdinak publikoari hurbilduz.

Borja Rodriguez Gasteizko Udaleko Ingurumeneko zinegotziaren hitzetan, "erakusketa honek beren argazki irteerak miaketa intimo bihurtu dituzten bost sortzaile bisualen begirada biltzen du, Arabako paisaietatik eta biodibertsitatetik gehien hunkitzen dituena harrapatuz. Gure inguruko sormen aberastasunean murgiltzeko eta irudia adierazteko, mundua interpretatzeko eta norberaren begiradak partekatzeko tresnatzat erabiltzen dutenen talentua ezagutzeko aukera da".

Horrela, ArabaClick egitasmoarekin lotuta Eder Santosek, Pascual de Harok, Maryge Rosadok, Iñaki Reguerok eta Samuel Torresek aurkeztutako argazki serieak ikusi ahal izango dituzte udazken honetan Atarira hurbiltzen direnek.

Arabako fauna eta geografiaren ibilbide errealista da egiten dute argazkiek, eguneko argi aldakorraren mende. "Artifizioak bilatu beharrean, erakusketak gelditzeko, landako soinu sotilak irudikatzeko eta Arabako aberastasun naturala baloratzeko gonbita egiten die ikusleei, bertan oinez dabiltzanen eta argazkiak ateratzen dituztenen sentsibilitatearen bidez", azaldu du.

'Irudizko Araba' erakusketa azaroaren 15era arte egongo da ikusgai Ataria zentroan, asteartetik igandera, 11:00etatik 14:00etara eta 16:00etatik 19:00etara.

Arabako 17 erakusketa gunek hartuko dute parte aurten ArabaClick VIII. Argazki Jaialdian, eta urrian eta azaroan, 64 artistak beren argazkiak erakutsiko dituzte dagoeneko finkatuta dagoen ekitaldi honetan.

Arabako argazkigintzaren hitzordu nagusia Revelare Kolektiboak antolatzen du, Vital Fundazioaren babesarekin eta Gasteizko Udalaren, Arabako Foru Aldundiaren, Jardín Remoto argazkigintza eskolaren eta FTG - Gorbeia 41 kultur espazioaren laguntzarekin.

Urriaren 31n izango da ArabaClick ekimenaren gala nagusia, Arkabian. Ekitaldian, Jardín Remoto argazkilaritza eskolan emango diren prestakuntza beken sei irabazleen lanak ezagutaraziko dira: bost beka orokor eta beka berezi bat. Aurtengo edizioko sari ekonomikoak jasoko dituzten pertsonen izenak ere jakinaraziko dira.

Era berean, 'Revelare Saria' emango da, argazkilaritzari bizitza eskaini eta arlo horretan arrasto ezabaezina utzi duten Arabako pertsona ospetsuen ibilbidea eta ondarea aitortzen dituen omenaldi hunkigarria.