Pasa den urriaren 15ean Dolu Perinatalaren Nazioarteko Eguna izan zela aintzat hartuta, eta Gaba Beltza jaia ospatzeko antolatutako egitarauaren baitan, 'Aitatxo' dokumentala ikusi ahalko da datorren astelehenean, hilaren 26an.

Proiekzioa 18:00etan izango da Herri Antzokian eta bertaratzen direnek Euskal Herriko hainbat gurasok sortutako Esku Hutsik irabazi asmorik gabeko elkarteak sustatu duen ikus-entzunezkoa ikusteaz gain, gidatutako tertulia batekin gozatzeko parada izango dute.

Enmanaldiaren ondoren egingo den tertulia horretan Anakotz Lasarte zuzendariak eta Iosu Elorza herrikideak beraien bizipenak elkarbanatuko dituzte; eta doluari aitaren begiradatik begiratuko zaio.

Izan ere, 'Aitatxo' dokumentalak aiten sufrimendua eta dolu eskubidea plazaratzen ditu; seme-alabaren bat galdu duten lau aiten testigantzaren bitartez. Bakoitzak egoera honi nola aurre egin dion azalduko da dokumentalean. Ama gutxietsi gabe, aitei hitza emanez horrelako egoeren aurrean, esperantza mezu bat zabalduz.