A cultura galega volve encender a súa memoria no solpor dunha terra que camiña coa certeza de que o mellor idioma é o que se comparte dende a liberdade. A recente celebración da cuadraxésima novena edición dos Premios da Crítica de Galicia na cidade olívica supón un novo fito de convocatoria e excelencia, poñendo de manifesto a vixencia dun proxecto que roza xa medio século de lealdade ininterrompida.

Como máximo expoñente do que pretenden estes galardóns, a figura de José María Fonseca Moretón exemplifica a simbiose perfecta entre a actividade agroindustrial e a adhesión inquebrantable á nosa identidade. No seo da cultura gastronómica, a súa traxectoria vincula a tradición ca vangarda, enraíza no saber popular, na lareira dos contos das avoas, na produción cárnica e láctea, na pesca e na acuicultura, na viticultura e no latexo profundo da terra, fundindo a creación co mecenado das artes. Galicia calidade.

Neste horizonte de excelencia, cómpre destacar a Fonseca Moretón como un verdadeiro polímata polifacético, un espírito inquedo e entregado que destaca pola súa profunda vinculación ás raíces galegas, combinando o seu liderado innovador no sector agroindustrial e vitivinícola —recuperando variedades autóctonas e proxectando a calidade internacional— co impulso ao cartelismo global, a firme implicación co mundo editorial e a súa inquebrantable dedicación á música e á sociabilidade de Galicia, demostrando unha valentía identitaria única.

Como empresario inversor, creador infatigable de riqueza e de emprego, e pola súa profunda participación e responsabilidade coas institucións do pensamento, Fonseca personifica desde o humanismo a achega total á sociedade.

Nesta emocionante convocatoria dos Premios da Crítica cabe felicitar calorosamente a todos os premiados —entre os que destacan Gonzalo Hermo, Antonio Salas Ellacuriaga, Universo Cantigas II, Cabreiros, Abraham Cupeiro, Mar Caldas, Laura Iturralde, Beli Martínez e o proxecto de comunicación do Real Club Celta—. Hai que aplaudir aos organizadores, o presidente Manuel Bragado Rodríguez, as vicepresidentas Malós Cabrera e Inma López Silva, a secretaria Malores Villanueva, e Roberto Pascual Rodríguez e Anxo X. Rajó, cuxo labor infatigable fai posíbel esta inmensa homenaxe á nosa cultura.

Como ocorre cos outros premios, non foi doado no eido da gastronomía cultural para un xurado que tamén valorou a traxectoria e a constancia dos outros dous grandes finalistas: Luis Paadín, unha das figuras máis imprescindibles, respectadas e apaixonadas do panorama vitivinícola e gastronómico, sumiller, técnico en viticultura e enoloxía, formador homólogo de referencia internacional e incansable divulgador; e do Fórum Gastronómico, pola súa incansable e ininterrompida contribución á difusión, debate e vangarda da cultura culinaria.

Coa mirada xa posta no horizonte da quinquaxésima edición, que se celebrará o vindeiro ano no mesmo lugar onde tivo lugar a súa primeira edición, o Hotel Samil, cunha solemne cea de gala, Galicia afianza o seu porvir sen perder a ternura das súas orixes. Facer país dende a raíz significa tamén lembrar a quen nos legou o pulso da creación, demostrando que a nosa voz é o latexo dun pobo que non se rende ao esquecemento. Hai que manter e aprofundar na convivencia e no respecto institucional dos que os premios creados a finais da década dos cincuenta por Bieito Ledo no Centro Ourensán vigués son unha boa testemuña.

Agora xa a gastronomía forma parte indisoluble da cultura, da identidade e da creación artística dun pobo que sabe reunirse en torno á mesa, nas romerías ou nos seus restaurantes e tabernas para expresar o mellor de si mesmo en convivencia plural. Brindemos por elo.

Suscríbete para seguir leyendo