O Bloque Nacionalista Galego (BNG) vén de solicitar ao Concello de Culleredo o acceso aos informes relativos ao pagamento das horas extras realizadas polo persoal da Policía Local, "á vista das noticias referidas ao Concello de Cambre polo mesmo motivo", sinalan, en relación co dictame do Tribunal de Contas coñecido esta semana sobre as horas extras á Policía Local en Cambre, que "declara a responsabilidade contable de varios cargos políticos e os obriga a depositar unha fianza".

"O alcalde de Culleredo, José Ramón Rioboo, levantou diversos reparos da Intervención municipal ao pagamento de horas extra en base a informes elaborados por unha concelleira do seu grupo de goberno, Marta Figueroa, concelleira delegada de Cohesión Social, Recursos Humanos e Réxime Interior", apunta o BNG nunha nota.

"Esta concelleira, que non é funcionaria municipal, asinou informes de discrepancia coa Intervención municipal co obxectivo de levantar os reparos que a habilitada puxo a eses pagamentos", engade a formación nacionalista.

Noticias relacionadas

"O BNG manifestou en reiteradas ocasións que este procedemento se aparta do establecido na normativa vixente, xa que estes informes deben ser elaborados por un funcionario público, non por un cargo político. Mesmo se tivo acceso a un informe do xefe de servizo de Economía e Facenda, referido ao pagamento de horas extras a outros funcionarios municipais, no que se indicaba que non se podía confirmar que fixeran horas extras xa que nen sequer se podía verificar que fixeran a súa xornada ordinaria", conclúe a nota.