Udako atsedenaldiaren ostean, berriro ekingo dio Lagun Onak mendi bazkunak azkenaldian abian duen egitasmoari. Ehunmilak Birako seigarren etapari helduko dio, laga zuen lekuan, Beasainen, alegia.

Goierriko herrian hasi eta Elosua bitarteko 30 kilometro izango dituzte aurretik Lagun Onak mendi bazkunako kideek larunbat honetan, hilak 19.

30 kilometro eta 2000 metroko desnibel positiboa ditu ibilaldiak. Tartean, besteak beste, Izazpi edo Irimo gailurretatik igaroko dira.

Irteera goizeko 7etan izango da, anbulatorio aurrean. Autobusez joango dira Beasainera. Hori dela eta, aurrez izena eman behar da, osteguna, hilaren 17a baino lehen. Izena emateko, Lagun Onak MBren kontu korrontean (Rural Kutxa: ES05 3008 0152 64 5416695822) norbere izen abizenekin diru sarrera egin beharko da eta ordainagiria lagunonak.ibilaldiak@gmail.com helbidera bidali, baita antolakuntzak jakin beharreko beste edozein informazio ere.

Bazkideek 15 euro ordaindu beharko dute eta, bazkide ez direnek, 20 euro.

Ehunmilak Bira egitasmoko azken etapa urriak 24an izango da. Elosutik Azpeitira iritsiko dira orduan mendizaleak, Irukutzeta eta Xoxote igaro ostean.

Igandean, irailaren 20an, berriz, egun osorako Herniora irteera antolatu du Lagun Onak mendi bazkunak. 9.00etan ipini dute hitzordua, anbulatorio aurrean. Itzulera, 17:00etan izango da, Errezildik.

Antolatzaileek adierazi dutenez, ordaina, autobusean bertan egin beharko da baina aurrez izena eman behar da, osteguna baino lehen.