Berriozarko lagun batekin kontua komentatu eta esan zidan “baina hori segur aski mozkor batek egina da”. Eta bai, segurki hala izanen zen... Mozkorra bai, baina oso fatxa.

Esaldia adbertsatiboekin –baina bezalako partikula adbertsatibo duten esaldiekin– oso gauza bitxia gertatzen da zeren esaldien hurrenkera aldatuz ere esan daiteke: “Fatxa hutsa da, baina mozkorra!”. Baina horrek zama kentzen dio, arintzen du hasierako baieztapenaren indarra. Eta ez da ber gauza esatea “Mozkorra da, baina fatxa hutsa!”

Batzuk ikaragarri fatxak dira, faxista hutsak, eta euskaldunon kontrako irainak gehiegitan irentsi ditugu. Beti harritu nau euskaldunok gure kontrako mezu iraingarriak eta laidogarriak irensteko erakusten dugun gaitasunak. Urte berri honetan gehiago ez irensteko zina egin diot neure buruari, eta Euskalerria Irratiko entzuleei euskaldunok irainak irensteko dugun gaitasun ikaragarriaz hausnartzeko eskatzen diet.

Batzuk fatxa hutsak dira. Bainarik ez; bainak, baratzean!