Вазирлар Маҳкамасининг 20.10.2026 йилдаги "Хорижда истиқомат қилаётган ватандошлар ва уларнинг оила аъзоларини Ўзбекистон Республикасига таклиф қилиш ҳамда фуқаролиги бўлмаган шахсларнинг биометрик ҳаракатланиш ҳужжатларини расмийлаштириш бўйича давлат хизматларини кўрсатиш тартибини такомиллаштириш тўғрисида"ги 579-сон қарори қабул қилинди.

19.01.2026 йилдаги ПҚ-14-сон қарорга мувофиқ, 2026 йил 1 сентябрдан бошлаб Ягона интерактив давлат хизматлари портали ва давлат хизматлари марказлари орқали қуйидаги давлат хизматлари кўрсатилади:

• хорижда истиқомат қилаётган ватандошлар ва уларнинг оила аъзоларини Ўзбекистон Республикасига таклиф қилиш;
• фуқаролиги бўлмаган шахсларнинг биометрик ҳаракатланиш ҳужжатларини расмийлаштириш учун ариза юбориш.

Ҳужжат билан тегишли давлат хизматларини кўрсатиш регламентлари тасдиқланди.

Ариза берувчи ҳужжатларни давлат хизматлари марказларига ёки ЯИДХП орқали тақдим этади, улар икки иш куни ичида кўриб чиқилади. Шундан сўнг етти иш куни ичида ваколатли орган электрон хулоса тақдим этади.

QR-код билан ҳимояланган электрон таклифнома ариза берувчига юборилади. Таклифнома у берилган санадан эътиборан уч ой мобайнида амал қилади.

Фуқаролиги бўлмаган шахснинг биометрик ҳаракатланиши ҳужжати – Ўзбекистон Республикасида яшовчи фуқаролиги бўлмаган шахснинг шахсини тасдиқловчи, чет элда ҳаракатланиши  тўғрисидаги ҳужжат эгасининг шахсий биографик маълумотлари ва биометрик параметрларини ўз ичига олган электрон ташувчига (чипга) эга бўлган ҳужжат.

Ариза олинган кундан бошлаб уч иш куни ичида ариза берувчининг яшаш жойидаги ваколатли орган томонидан кўриб чиқилади. Кўриб чиқиш ва тасдиқлашдан сўнг, ваколатли орган ариза берувчига унинг биографик маълумотлари, рақамли фотосурати ва электрон бармоқ изларини (16 ёшдан ошган шахслар учун) ваколатли органга тақдим этишни сўраб билдиришнома юборади.

Ариза берувчи ДХМ ёки ЯИДХП орқали хабарнома олинган санадан бошлаб бир ой ичида ваколатли органга зарур ҳужжатлар билан бирга ариза бериши керак.

Ҳужжат Қонун ҳужжатлари маълумотлари миллий базасида эълон қилинган ва 21.10.2026 йилдан кучга кирди.

Лола Абдуазимова