Det nye samarbeidet blei kjent under eit arrangement om forsvarsindustrien måndag.

I samarbeidet inngår Umoe Mandal saman med fem andre norske verft.

Målet å sikre seg ein kjempekontrakt.

– Det kjem til å bli tøff konkurranse, men vi meiner vi er konkurransedyktige, seier Tom Fidjeland, direktør ved Umoe Mandal.

Forsvarsminister Tore O. Sandvik var til stades då det nye samarbeidet blei kjent.

Samarbeidet er organisert som eit konsortium der fleire selskap inngår. GOT Marine i Mandal er mellom selskapa som er med.

Oppdraget dei er ute etter er å levere 30 kommandobåtar til britiske BAE Systems.

– Det er ein veldig stor kontrakt på fleire milliardar. Utover det er det vanskeleg å sei kva dette betyr, det vil mellom anna avhenge av kor raskt det skal leverast, seier Fidjeland til NRK.

Kommandobåtane er 24 meter lange og kvar båt har ein verdi på rundt 100 millionar ifølgje Dagens Næringsliv som også har omtalt leveransen.

Det er allereie inngått avtale mellom Umoe Mandal og BAE om å levere kommandobåtane.

Ifølgje Fidjeland er det som gjenstår at BAE Systems igjen får eit slikt oppdrag frå Forsvarsmateriell.

– Men dei er godt posisjonerte for å vinne kontrakten, meiner Fidjeland.

I så fall blir Umoe Mandal og deira konsortium underleverandør av kommandobåtar til BAE Systems.

Forsvarsmateriell er ein etat som ligg under forsvarsdepartementet og som står for innkjøp til Forsvaret.