Joan den ostegunean, urriaren 22an, zuzendaritza batzordea izan zuten Urola Kostako Udal Elkartean, eta horren ondotik, oharra kaleratu du Urola Kostako EAJk, EH Bilduren hondakinen bilketa zerbitzuaren kudeaketa salatzeko. Talde jeltzalearen ustez, "bilerak agerian utzi ditu Udal Elkartearen zuzendaritzaren aurreikuspen falta eta kontratazioaren plangintzan dauden gabeziak".

Bileran, EAJk galdetu zuen ea 2027rako proposatutako tasekin bilketa kontratu berriaren gastuak estali ahal izango ziren –aurreko kontratua berritzea tokatzen delako–. EAJren arabera, Ion Arozena lehendakariak (EH Bildu) esan zuen ez zirela konpentsatzeko gai izango. "Hau da, idazkari kontu hartzailearen txostenak esaten zuenaren aurkakoa esan zuen, eta jarraian, tasen igoera bat onartu beharko zela aitortu zuen, eta kontratu berriaren kostua ezagutu ondoren ezohiko ordenantza fiskalen aldaketa bat onartzea aurreikusi zuen". Alderdi jeltzaleak azaldu du Arozenak adierazpen horiek egin arren, EH Bilduko ordezkariek tasen igoeraren hasierako onespenaren alde bozkatu zutela.

EAJren ustez, "bereziki kezkagarria" da proposamenaren aurreikuspen ekonomikoek 2027rako kalkulatutako gastuak estaliko direla jasotzea, lehendakariak berak kontratu berriak beste igoera bat eskatuko duela aitortu duenean.

Egoera are larriagoa da EAJrentzat, hondakinen bilketa zerbitzuak gaur egun dituen gabeziak kontuan hartuta. "Herritarrek gehiago ordaindu beharko dute, zerbitzuaren kalitatean hobekuntza zehatzik aurkeztu gabe".

Talde jeltzaleak gogorarazi du azken hilabeteetan behin eta berriz salatu dituela Urola Kostako hainbat udalerritan antzemandako arazoak: "gainezka egiten duten edukiontziak, zikinkeria, usain txarrak, bilketa-kamioietatik isuritako likidoak eta arratoien presentzia zenbait gunetan", zehaztu du. Eta jakinarazi du Zarauzko Udalak arratoi eta labezomorroen aurkako prebentzio neurriak iragarri dituela, eta Aiako Udalak ere bere baliabideekin esku hartu behar izan duela osasungarritasun arazoei aurre egiteko. 

Egoera horren aurrean, EAJk eskatzen die EH Bilduk gobernatzen dituen udalerrietako arduradunei  "argitzeko zer neurri hartu dituzten eta zer azalpen eskatu dizkioten beren alderdiak zuzentzen duen udal elkarteari".

EAJren ustez, herritarrek ez dute "etengabe ordaindu behar" plangintza faltaren eta kudeaketaren gabezien ondorioak. "Urola Kostak kudeaketa arduratsua, kale garbiak eta kalitatezko hondakinen bilketa zerbitzua behar ditu".