Oinarrizko laguntzak eskuratzea erraztu bazaie ere, kale gorrian bizi diren gazte magrebtarrentzat ia ezinezkoa suertatzen da etxebizitzarako sarbidea. Halaxe azaldu du Samira Calvo Derecho a Techo ekimeneko kideak Bigarren Solairuan. "Instituzioetatik laguntzak iristen dira, baina eskasak eta mugatuak dira, ez diote arazoari errotik heltzen. Errolda eta oinarrizko diru-laguntzak jasotzen badituzte ere, kalean dauden gazte hauek oso oso zaila daukate etxebizitza bat lortzea. Inork ez die alokatu nahi eta ez daukate egonkortasun ekonomikorik. Horrela, oso zaila da". Arazoari elkartasun sarearen bitartez aurre egitea erabaki du, hartara, bere sustraiak Katakraken dituen Derecho a Techo ekimenak, eta horretarako sortu da Fraktal, 24 pertsonentzako lekua izanen duen aterpetxea. 

Iruñeko Kale Nagusiko 54. zenbakiko lehenengo solairuan kokatuko den egoitza ez da "aterpetxe soil bat" izango. Alde batetik, hiriko periferietan sakabanatuta eta bakartuta dauden gazte migranteen arteko sarea ehundu eta antolatzeko lekua eskainiko die. Bestalde, Mugen Kontrako Europako Agentziaren bulegoa ere bertan kokatuko da, bere baitan Derecho a Techo ekimenaren tankerako beste bost elkartasun sare biltzen dituena. Horretaz gain, "kontrakultura sustatzeko areto txiki bat" ere izanen du, Calvok azpimarratu bezala, "Katakraken ahizpa txikia izanen dena".

Espazioa atondu ahal izateko, Derecho a Techok crowfunding kanpaina bat abiarazi du, abendura bitarte irekita egonen dena. "Gutxienez 330.000 euro behar ditugu espazio guztia txukuntzeko, eta periferietan baztertuta dauden horiei leku seguru bat emateko". Ekarpenak Fraktalen webgunean bertan egin daitezke, www.fraktal.net/eu/ helbidean.