Arrakastatsua izan da beste behin Gaztetandik kultur elkarteak Errezilen antolatutako XIII. Sagardo Lehiaketa Herrikoia. Jende ugari gerturatu zen herriko frontoira pasa den larunbat gauean Errezilgo baserri desberdinetan ekoitzitako sagardoa probatzera eta era berean, lagunarteaz eta jana eta edanaz gozatzera.

18 sagardogile izan ziren lehian eta epamahaiaren iritziz, Agerre Goikoa baserriak ekoitzitako sagardoa izan zen onena. Zumeta baserria geratu zen sailkapeneko bigarren postuan, eta Iraola Zaharra sagardogilearentzat izan zen hirugarren postua.

Ez zen sagardoa bakarrik izan Gaztetandikek antolatutako festaren protagonista. Pintxoak eta kafea ere izan zituzten bertaratutakoek eta janarekin batera, banan-banan probatu ahal iza zuten herriko baserrietako zukua. Ondoren, euren iritzia ere kontuan hartu zen. Hala, publikoaren saria Basabek jaso zuen eta haren atzetik Erdoiztak eta Agerre Goikoak eskuratu zituzten bigarren eta hirugarren sariak.

Honako hemezortzi baserri hauek hartu zuten parte txapelketan: Urdalleta, Agerre Goikoa, Buztinzuri, Irure Txiki, Estrada Zaharra, Lasturreta, Aritzeta Goikoa, Ibarguren, Galarraga saletxe, Aranguren, Zuazketa, Zumeta, Iraola Zaharra, Basabe, Aritzeta Azpikoa, Mugarrieta, Muno Haundi eta Erdoizta.