Før sommaren la regjeringa fram den nye planen sin for korleis dei vil redde den kriseramma Oslofjorden.

Håpet er at omfattande restaureringsprosjekt skal snu den kritiske miljøtilstanden i fjorden.

Korleis?

• Redusere utslepp frå avløp og landbruk
• Stanse nedbygging i strandsona
• Verne sårbare artar gjennom omfattande fiskerestriksjonar.

No ber ei rekke organisasjonar og myndigheiter om at regjeringa får gassen i botn.

I mange år har bygging i strandsona vore eit konfliktfylt tema mellom hytteeigarar, utbyggarar og kommunane, særleg rundt Oslofjorden.

Nokre stader er det så betent at sakene har gått til Høgsterett, og nokon har bede om eit eige strandsonepoliti.

No er planane ute på høyring. Og reaksjonane er mange også her.

Nesten 150 privatpersonar, interesseorganisasjonar og myndigheiter sagt sitt. Og det er før kommunane langs Oslofjorden har sagt kva dei meiner om saka.

Noregs miljø- og biovitskaplege universitet på Ås meiner kommunane må miste retten til å bestemme i strandsona.

– Historiske data har vist at kommunane ikkje evnar å avgrense nedbygging av strandsona, skriv rektor Solve Sæbø til regjeringa.

Også forskingsmiljøet ved Universitetet i Søraust-Noreg (USN) kastar seg på debatten.

Dei peikar på at strandsona framleis blir bygd ned bit for bit, særleg fordi kommunane seier ja til dispensasjonar i heile 40 prosent av sakene.

– Vi meiner hovudutfordringa ikkje er mangel på mål eller gode intensjonar, men at dagens verkemiddel ikkje alltid gir tilstrekkeleg gjennomføringskraft, seier forskar Annette Bischoff ved universitetet til NRK.

Ho har blant anna jobba med menneskets forhold til natur og friluftsliv.

– Dette handlar ikkje om å stoppe all lokal utvikling, men om å sørge for at dei mest verdifulle områda blir forvalta på ein måte som tar vare på naturen og den allmenne tilgangen over tid.

Også Statsforvaltaren i Vestfold og Telemark er tydeleg på at oppfølginga av byggeforbodet ute i kommunane ikkje har vore bra nok.

Dei får framleis mange dispensasjonssaker frå kommunane og ser at det blir lagt opp til stor omdisponering av strandsoneareal i kommunale planar.

Statsforvaltaren meiner også at det i førre Oslofjordplan blei lova ressursar til dispensasjonspraksisen i kommunane, men at dette aldri blei gjennomført.

Sjølv om mange har sagt sitt i høyringsrunden, står kommunane og fylkeskommunane i og rundt Oslofjorden igjen. Dei har høyringsfrist 15. oktober.